ايطاليا أو الغرق ... للروائي/ السعيد أحمد نجم

ومضت الحياة ثقيلة كسحب الشتاء الغاضب .. شهر مضى كأنه أعوام ظهر على وجوهنا أثر

- أنا اللي بطلب منك تتجوز .

وضعت سعدية حملها بنتًا .. زاد حقدها عليَّ كأني أنا الذي حدد نوعها ! كأنها فرغت لمضايقتي .. تتفنن في ذلك وتجيد .

كنا في بيت صديقي المفضل فوزي .. سهرنا نستذكر الدروس بعيدًا عن البيت الذي أصبحت أكرهه .. عدت إلى غرفتي منهكًا حيث كان عليوة يتهيأ للنوم ، تبادلت معه الحديث .. سمعنا صوت والدنا عائدًا هو الآخر من مكان ما .

يسمع صوت الحرباء باكية متشنجة .. ترى ماذا في قراب الحرباء هذه المرة ؟ توقعت سوءًا ، ووقعت في حيرة الانتظار .. صوتها يصل إلينا واضحًا مختلطًا ببكائها المتصنع تقول لأبي :

- والله ما عاد ليه قعاد في البيت ده ثانية واحدة إن ماشفتش حل .

- فيه أيه يا ولية .

- فيه أيه ؟ .. مصيبة سودة يا خويا .. يا خرابي .. يا خرابي !

ولطمت خديها بقسوة .

- يا ولية حصل أيه الله يخرب بيتك .

- ابنك الكبير فاكرني واحدة كده والا كده .. كام مرة يلمح لي بكلام فارغ ويتبصص عليه ، قلت لأ مش معقول دا هوه متعلم في المدارس ، وأنا يعني في مقام أمه .. ما صدقتش نفسي ، يقوم النهاردة .. يا خرابي .. يا مصيبتي السودة ..

- يا ولية جننتيني اتكلمي دي باين هتبقى ليلة سودة .

- النهاردة يظهر عرف انك هتسهر بره جه اتهجم عليه في أوضتي وقال انه بيحبني وعايزني ..

وارتفع صوت نحيبها كأنها ستموت بكاءًا .

- ابن الكلب .. ابن الكلب .. موته حل النهاردة .

انطلق أبي كالإعصار .. لعله هذه المرة يريد قتلي بعد أن شرب سم الأفعى .. اعترضه عليوة وقد اشتد عوده ، وقف في وجهه كالحصن المنيع قائلًا :

- يابا فتحي هيبص لمراتك .. هيبص لسعدية ، دا بيقرف منها .. يابا كفاية بقى تسمع لها دي تعبان أصفر .

- ميل يا ابن الكلب .. تعبان يمص عينك .. موته حل النهاردة ، يعني موته .

- يابا حرام عليك ! اسمعنا مرة واحدة .. أنا كنت موجود مع فتحي .. فتحي لسه جاي من برة قبل ما تيجي إنت بخمس دقايق ، لا راح ناحية الحية دي ولا شافها بعينه حتى .. فوق يابا .

ووالدي يدنو بكل عزمه لا يسمع له ، وأنا لم أحرك ساكنًا وعليوة يقول :

- والله لو جبت حتى "لودر" ما حسيبك تروح لفتحي .. يابا حرام عليك ، والله حرام .

- عليه الطلاق بالتلاتة ما انتم بايتين فيها .. ان قعدتم هقطع رقبتكم انتم الاتنين .

وهو يلهج والغيظ والغيظ يذهب به في كل واد وعليوة يقول له :

- طيب هدي نفسك ، والله ما احنا بايتين فيها .. كده ما يبقاش لنا قعاد في البيت خلاص .. إدينا ساعة واحدة نلم حاجتنا .

- في ستين داهية !

- متشكرين قوي يابا !

لملمت أشيائي والدنيا ضيقة أمامي كثقب إبرة وعليوة يربت على كتفي ويقول :

- ولا يهمك يا فتحي . ربنا ما بينساش أبدًا عبده ، ما يهمكش أي حاجة طول ما أنا جنبك ، بينا على بيت خالنا الكبير لغاية ما يحلها الحلال .

منذ أول لحظة لوت زوج خالي لنا بوزها .. أعرف أن لقمة عيشهم شحيحة .. أعرف أن أسرة خالي كتيبة أفواه لم تعرف يومًا شبعًا حقيقيًا .. أعرف أيضًا أنه رقيق القلب ، كري لكن ماذا يستطيع والفقر المدقع أغلال في يديه ؟

أسبوع مر علينا طويلًا كأنه الدهر وزوجة خالي لا تكف عن المشاجرة بسببنا معه .. وصلت إلينا رسالتها منذ أول لحظة .. خالي يلعق مر الصبر ، ويتحمل ، وتدمع عيناه كلما نظر إليّ ، كثيرًا ما احتضنني وبكى .. يعرف ما كنت فيه من نعيم قبل رحيل أمي .. حاول الإصلاح بيننا وبين أبي ولم يستطع .

كنت أظن أن عيوة لا يدرك حرج موقفنا كما أدرك .. كان يبدو أمامي طبيعيًا ، يحاول التخفيف عني وتعلو ضحكاته .. فاجأني بقوله :

- ياللا يا بطل على بيتنا الجديد .. كتر خير خالنا .

- بيتنا !

- أيوة بيتنا .. بيتنا احنا مش بيت أبونا .

- مش فاهم!

- لقيت أنا وفوزي أوضة بالإيجار .. هيه مش ولابد يعني إنما ماشي الحال لغاية ما ربنا يفرجها .. ربك كبير يا فتحي .

ثانية رحلنا وخالي يرافقنا ويقدم لنا ألف اعتذار .. يوصي عليوة :

- خد بالك من أخوك .. يا ريته ما ادلع وهو صغير .. يا ريت أبوك وأمك كلنوا شغلوه وبهدلوه ماكانش بقى حاله كده .

- ولا يهمك يا خال .. فتحي راجل .. شوية بس كده وهيبقى تمام التمام .. هوه بس حساس شوية واللي حصل برضه مش حاجة سهلة .

- ربنا معاكم يا ابني .. ربنا يقدرني أعمل لكم أي حاجة .

- يا خال كفاية اللي انت فيه .. احنا عارفين ظروفك كويس .. كتر ألف خيرك .

- على عيني يا ابني والله طلوعكم من بيتي .

وبكى الرجل .. أوصلنا إلى بيتنا الجديد كما سماه عليوة وتركنا وقلبه يفيض بالشفقة ، ودعاؤه لنا لا ينقطع .