تعتعة ......وخربشة ......آخر الليل !!

تعتعة ......وخربشة ......آخر الليل !!

- بلدي يللي كنت زمان قوت القلوب ..وداب في هواكي اكثر من مليار محبوب ...قوتك مسلوب ...وخيرك منهوب ...وابنك بره وجوة علي قفاه مضروب ... لحين ورود جديد .

- بلدي يام ملاية لف وعيون بهية كثروا فيك النصابيين والحرامية ..........وكمااااااااااان البلطجية ....واللي كانوا بيحكموكي عملوها تكية خلو شعبك يشحت ويستني الأكراميه .

- في بداية حكم المخلوع كانت مصر تلهث من الاحداث السياسية ....الوقتي ارتوينا أحداث سياسة ، ونلهث من العطش ...نهر النيل حيضيع يا وديع........ الحقوا نهر النيل يا رجاله ... ويكون في اولويات المجلس القادم والرئيس القادم .

- للأسف قانون الشهداء سيستمر مدي الحياة لأن كل من يحاول المساس بكرامة الشعب سوف يجد آثار لدماء الشهداء في كل شبر في ارض الكنانة وأرواحهم هتطاردوا في كل مكان ....يعني إمشي عدل يحتار شعبك فيك .

- حكامنا كانوا نايمين ومازالوا ...لدرجة إننا أصبحنا دولة مستقلة ذات وسادة ....وفجأة افزع الشعب الحكام فزعة حرمتهم من لذة النوم طول حياتهم ، وإذا ما ناموا فمغمضين عين ....ومفتحين عين ...كي لا يفقدوا الاثنين معا... اللي قد مهر العروسة يدفعوا ...دا ...ست الدنيا ...وأم الدنيا...مش أي عروسة .

- مادام مصر وراها كل هذه المشاكل يبقي نجوزها ونخلص ................ من راجل ابن حلال ...يحكمها ويدافع عنها وعن اراضيها ويراعيها ويراعي أولادها من المصير المجهول ............ونخلص من الشائعات وكلام الناس ...شكلني بقي وحش أوي قدام الدول ألاخري .... وبلاش مبالغة وتناكة في الموصفات واللي يشوفه أبوك هو اللي يمشي .......... قصدي اللي يشوفه الشعب هو اللي يمشي .

- مش عايزين في كل مرة يتحدث فيها مسئول ما في مؤتمر ما ....... نشوف الراجل اللي بيقف وراه علي طول دا .. اللي بيقول مظبوط علي طول الخط ............. مظبوط دي بتاعتنا إحنا ...الشعب ....وإلا هنشربها علي روحك يا إما سادة ....يا إما علي الريحه ...أوكيه ياعم المسئول إنت وهو ...وهو ...وهي ...وهي .

- كل طفل كان بيتولد في عهد المشلول كان بياخد وقت طويل علي بال ما ينطق ...الوقتي اللي هيتولد هينطق علي طول ................ يا بختهم الاطفال اللي هيشرفوا اليومين دول ...مين زيهم .

اقتباس :: - مادام مصر وراها كل هذه المشاكل يبقي نجوزها ونخلص ................ من راجل ابن حلال ...يحكمها ويدافع عنها وعن اراضيها ويراعيها ويراعي أولادها من المصير المجهول ............ونخلص من الشائعات وكلام الناس ...شكلني بقي وحش أوي قدام الدول ألاخري .... وبلاش مبالغة وتناكة في الموصفات واللي يشوفه أبوك هو اللي يمشي .......... قصدي اللي يشوفه الشعب هو اللي يمشي

انا بقول كده برضه وعندي ليها عريس قصدي رئيس انما ايييه .. طيب وابن حلال وفااااااااااهم .. (حازم صلاح ابو اسماعيل) ها مين هيقرا معانا الفاتحة ويصوت له ؟

اقتباس :: - كل طفل كان بيتولد في عهد المشلول كان بياخد وقت طويل علي بال ما ينطق ...الوقتي اللي هيتولد هينطق علي طول ................ يا بختهم الاطفال اللي هيشرفوا اليومين دول ...مين زيهم

وانا اقول الاحوال بتسوء في مصر من اييييه ؟!! من كتر النق ع الاجيال اللي لس هتطلع ... انووا خير خلوها تعدي على خييييير !!

salah كتب:: تعتعة ......وخربشة ......آخر الليل !!
- بلدي يام ملاية لف وعيون بهية كثروا فيك النصابيين والحرامية ..........وكمااااااااااان البلطجية ....واللي كانوا بيحكموكي عملوها تكية خلو شعبك يشحت ويستني الأكراميه .
.

ما أجمله من تشبيه اخى الحبيب صلاح
بلدنا دايما كانت هى المحبوبة فى صورة الام والأخت والزوجة
علشان كده طمعوا فيها أصلها لو كانت وحشة ما كانوش فكروا فيها
جزاك الله خيرا اخى الحبيب

اذا كان الحل في انها تتجوز....
فالعرسان كتير والحمد لله
ومتقدملها خطاب كتير
واذا كان الشيخ حازم مش نافع نشوف الدكتور سليم العوا او ايمن نور
هنشوف مين هيقدرها اكثر ومين اللي طول عمره صوته عالي عشانها
ويارب مشكلتها تتحل بقي وفي اقرب فرصه منستناش لشهر 6 .... كتير
عاوزين نخلص !!!!

أشكر حضراتكم جميعا علي المرور والتعليق لرائع المثمر

دكتورنا الفاضل /عمرو عبدالظاهر .

أختنا الفاضلة / ديموقراطية .

ختنا الفاضلة / لقاء .

جزاكم ربي عن الاسلام مكرمة......... وزادكم الله من افضاله كرما

اللي عايز يتعتع ...ويخربش ......مفيش مانع ...الخربشة للجميع

- اية يعني اغلبية مثقفين تلبانة دخلوا مرحلة البيات الشتوي مبكرا ... رغم سخونة الاحداث وارتفاع درجة حرارة البلد ....آكد كبير المسقفين بأنهم في انتظار دفعة أصلية من الدفيات لترفع من درجة حرارتهم حتي يتحركوا ...وهم في انتظار اول مولود في السنة الجديدة ويطلقون عليه اسم / صلاح الدين ..لكي يرسم لهم طريق قضبان القطار ليسيرو عليه كالاكسبريس الاسباني ..او الفرنسي ....وبلاش القشاش التايواني,, عشان بياخد وقت طويل علي ما يوصل المحطة وكداااا...هننتظر مولود جديد تاني في السنة اللي بعدها ....حجج فارغة .

- في رمضان منذ سنتين كان يعرض مسلسل الملك فاروق ورمضان قبل الماضي مسلسل عبدالناصر .....حان الوقت لمسلسل جديد يلا أي مخرج محترم يعملنا مسلسل ل (عنتر وعبلة وشيبوب ) .

- كويس إنها عايشة ..مصر فتحها عمرو بن العاص ..وفتحها سليم الاول ...وفتحها نابليون ... الاعجب انهم فتحوها دون بنج ...والاكثر عجب انها قطعت إربا واشلاء في حكم عنتر 2011 وبرضه بدون بنج ...لألألألألألألألأ دا احنا بلدنا جامدة اوي ...قد تجرح وتمرض ويهتك عرض بناتها لكن لن تموت ابدا .... صبح صبح يا عم كاطو....واحلي من الشرف مفيش ؟؟؟؟؟؟؟؟؟؟؟؟؟!!!!!!!!!!

- المنطقة تغلي والبلد تغلي ....عندي غحساس أننا نعيش في حله ....يعني علي المخلصين من ابناء الوطن تهدئة حرارة البلاد حتي لاتسيح الحلة بمن فيها ...يبقي ولا كلنا ولا خلينا حد ياكل .....علي الاقلل نسيب حتة لغيرنا ياكل فيها ....دا اللي ياكل لواحده يسيح ...ولا اية !!

- صرح مصدر غير مسئول بالمجلس بأنه تم صرف مكافأت خاصة ومن جيبوبهم الخاصة لكل من شارك في عملية (هتك العرض المقدسة ) أجازة شهر ...5000 جنيه لكل فرد ...زي الشهيد !!!!! مش هيمسكوا خدمات تاني ...وكماااااااااااان تم ترقيتهم الي رتبة اعلي الجندي ... شاويش هاتك ...او صول هاتك .......وهكذا مع ضابط الوردية ...؟؟؟؟؟؟؟؟؟ّّّّّّّّّ!!!!!! وعجبي علي جيش 2011 .
- أعلن اللهو الخفي مسئوليته التامه عن كل احداث الفوضي والشغب والقتل التي حدثت في البلاد الفترة الماضية ...وذلك حرصا منه للتعاون مع المجلس العسكري اللي داخ السبع دوخات يا عيني ...عن المتورطين في الاحداث الماضية (محمد محمود ...القصر العيني ...شارع ريحان ...مجلس الوزراء ...اطفيح ... قصة ان الفاعل مجهول باخت اوي ...الراجل اعترف بلسانه ...ومحدش أجبره او عذبه عشان يعترف ....آه يا مجهول آخر زمن .

- صرح خطيب خطباء تلبانة أنهم لن يتركوا ولن يتخلوا عن المنهج والسيستم الذي وضعه النظام السابق ...مؤكدين أنهم سيظلوا أوفياء له حتي النهاية ...وأنهم لن يضيفوا جديد علي خطبهم القادمة ولن يربطوها بالاحداث الحالية والواقع التي تعيشه البلاد (فالهجرة ...هي الهجرة ...كما في كتب السيرة ...والاسراء والمعراج ...وصوم رمضان ...وليلة النصف من شعبان ...والحج ....كما جاء في كتب السيرة ...ولن يزيدوا جملة واحد عن الواقع ..... وستظل خطبنا روتينية الي ابعد الحدود ...وهو دا اللي عندنا ؟؟؟؟؟؟؟؟؟؟؟؟!!!!!!!!!

- بعد تعينه عمدة لتلبانة ، اكد المعلم / بخ فلانتينو.... انه سيعمل علي تلبية رغبات شباب القرية الخرمانين ..واللي مش خرمانيين (للدبابيس ...والقروش ..الزغاريف...الخ )، وأنه في بداية العام القادم سيغرق السوق بأصناف جديدة لم يسمعوا عنها من قبل مثل (نانسي ..هيفا ...وميسي ..كاكا ..دي أسامي تموية عشان الثوار والحكومة متعرفش ...وبرضوا عشان النجوم متزعلشي ،مشيرا أن الحالة التي عليها ثورجية القرية تتيح له إتمام صفقات متعددة لتكييف مزاج شباب القرية في وش البلد ووسط البلد وآخر البلد ، وايضا زيادة عدد الاقراص المخدرة داخل الصيدليات المشبوهه ...التي تراعي كيف ومزاج الشباب ...والتسليم والتسلم هيبقي في بطن الزير ...تمويه يعني ... وكلمة السر العجل في بطن امة ....صح النوم يا رجالة ...فانتم كالعادة يا إما تجعلونا نصرخ إنبهار من تصرفاتكم ومواقفكم الرائعة ...وإما تجعلونا غضبانين وموجوعيين من تطنيشكم وتكبير دماغكم عن وضع القرية ... سمعني يا ابني اغنية ...حيرت قلبي معاك .

اية يعني اغلبية مثقفين تلبانة دخلوا مرحلة البيات الشتوي مبكرا ...

رغم سخونة الاحداث وارتفاع درجة حرارة البلد ...

بيات الشتوى دا مطول كدا ليه .....دا حتى مش كويس ان لم يكن

هناك مخزون قوى ورصيد لانه البيات يستنزف من المخزون ان لم يعوض

انتهى مع الوقت وضاع و اندثر صاحبه الى الابد

اتمنى من الله ان ينتهى هذا البيات قبل ان ينقلب السحر على الساحر

أشكرك اخي الحبيب /هدوء علي المرور والتعليق الرائع المثمر

أتمني أن ينتهي البيات الشتوي ....... ونستغل مجهود وطاقات الشباب لصالح القرية .

جزاك الله خير

رائع فيلسوفنا المبدع

أسلوب ، وهدف

ولكن شوية مبالغة ، فيه ناس كتير صحت من البيات الشتوي وراحت البيات الصيفي

وفيه ناس لا باتت شتوي ولا صيفي

وفيه ناس بيقولوا خلينا نتفرج

وفيه ناس رفضوا حتى الفرجة

لكن الأغلبية للصحيين بجد ، والـ فهموا اللعبة صح وبيلعبوا صح

يا عم قصدي حددوا هدفهم ورسموا طريقهم وصححوا مسارهم

وربنا معانا

قل ... آمين

آآآآآآآآآآآآآآآآآآآآآمين

اشكرك استاذنا الفاضل (مايسترو لغتنا الحبيبة والقيم الجميلة ) .

الحمد لله إني اخطأت التقدير والظن بهم ........والله دا شيء يسعدني جداااااا ويسعد الا غلبية التلبانية التي تريد الخير لهذه القرية المستيقظ اهلها مؤخرا ..........وربنا يعينيهم علي فعل الخير والاستمرار فيه .

جزاك الله خيرا

الناس في حاجة إلى ثورة أخلاق تقضي بها على كل مشاكلها وكل أنواع المخدرات والمسكرات لكي تفيق وتبدأ بثورة عمل وإنتاج بجد وإخلاص.

اشكرك استاذنا الفاضل / عمر فؤاد علي المرور والتعليق الهادف .

ان شاء الله هتقوم ثورة الاخلاق للقضاء علي المخدرات والمسكرات ومروجيها ومتعاطيها ................... وتحريك المتفرجين علي كل هذه المشاهد المزعجة لنا جميعا .

» ذهب الليل وطلع الفجر بعد الثورة بالصعيدي
» اتتني في سكون الليل ،،،،،، أطياف لماضينا