تعظيم سلام
تعظيم سلام لمصر ست الكون
ارواحنا عاشقة ترابه فين مانكون
كامل كياننا بعشقها مسكون
وهي مهد العش والعشاق
............
تعظيم سلام لكل بيت فيكي
ولكل حصن حانون مدفيكي
ياما قولت من احساسي ح انفيكي
لكن بارجع احنلك واشتاق
................
تعظيم سلام والجيرة والعشرة
دهب وماس برلنت مش قشرة
وشوش بريئة لاخاينة ولاكشرة
قرب وخدلك درس في الاخلاق
....................
تعظيم سلام للي حما عيلتي
وف غيبتي عن وطني سندميلتي
وانا برة مصر لقيته ضليلتي
وعيالي وعياله ف حضنه سواء
.........................
تعظيم سلام لقلوب بشر صادقة
قالوا نموت وتعيش ماهش فارقة
لكن ح نحمي بكرة م السرقة
وما فيش فروق لا في دين ولا ف اسماء
..............
تعظيم سلام لكنيسة مع جامع
ولكل حارة وناصية مع شارع
هما اللي جابوا فجرك الطالع
توأم ف لون الدم والاشلاء
.................
تعظيم سلام يا امي يا بهية
تلاتين سنة بيجربوا فيا
واما طالبت بعيش وحرية
عايزيني ارجع عتمة الانفاق
.................
تعظيم سلام لحفيد واب وجد
ماخافش لكن قام وخدها بجد
مين اللي قال الثورة ملك لحد
غير الطرامة مفيش امل ورجاء
................
تعظيم سلام يا بنت مصرية
قلتي لحبيبك مهري حرية
سندي واماني ف دنيتي الجاية
علشان ولادنا يشوفوا خير ورخاء
..................
تعظيم سلام لكيبورد مع شاشة
فضحت نوايا خاينة غشاشة
وقلوب مريضة حاسة بهشاشة
سارقة عرقنا وهي اصل اداء
............
تعظيم سلام لبنات مع صبيان
من غير رصاص ولا آلي ولا عصيان
طلعوا المظاهرة يرفضوا الطغيان
ويقولوا للظلم الطويل إلغاء
..................
تعظيم سلام لحشود بتزرع ضي
طلعت تقابل فجر بكرة الجي
وماهمهاش ضرب الرصاص الحي
مارد غضب حطم قيودة وفاق
.............
تعظيم سلام لشباب جمعها مصير
زوق هتافها ميت ميدان تحرير
هانت خلاص وماعادش باقي كتير
بقي صعب تاني نتحكم بغباء
..........
تعظيم سلام يامصر يا معاندة
مالناش ميول سياسة واجندة
ولا لنا شوق نعمل بروباجندا
وماتسمحيش لعبدة بية مشتاق
...................
تعظيم لحر ما عامش مع موجة
ما سرقش حلم ف معمة وهوجة
ولا قال كلامة بنية معوجة
عشان يبان في نشرة الانباء
................
تعظيم سلام للي رفع راسنا
علشان ف وقت الشدة يحرسنا
ولاميت نظام تاني هيخرسنا
بدراعنا نحميها من الغوغاء
..............
تعظيم سلام يا لجان يا شعبية
قولوا للجبان اللي خلا بيا
ما احناش عيال هايفة وسلبية
مصر الحضارة تصد أي بلاء
.................
تعظيم سلام للي وقف راجل
بعد اما جالة بيان هروب عاجل
قال لو كرامتي هبيعها بالآجل
أية فايدة إني اكون من الاحياء
...................
تعظيم سلام ياساحة التحرير
اسفلت ارضك كان دفا وحرير
ومها تاني رجعت انام في السرير
مش حانسي واحد مرة بات في خلاء
.................
تعظيم سلام يامصر
تعظيم سلام
.............
اشرف الشافعي
الثلاثاء أغسطس 16, 2011 1:51 pm
